അമിത അളവിൽ ഉറക്ക ഗുളിക കഴിച്ചു; അലൻ ഷുഹൈബ് ഗുരുതരാവസ്ഥയിൽ

കൊച്ചി: പന്തീരാങ്കാവ് യുഎപിഎ കേസ് പ്രതി അലന്‍ ഷുഹൈബിനെ അവശനിലയില്‍ കണ്ടെത്തിയതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചു. അമിത അളവില്‍ ഉറക്കഗുളികകള്‍ കഴിച്ച നിലയില്‍ ഫ്‌ലാറ്റില്‍ നിന്നാണ് അലനെ കണ്ടെത്തിയത്. തീവ്രപരിചരണ വിഭാഗത്തിലാണ് പ്രവേശിപ്പിച്ചിരിക്കുന്നത്. ‘സിസ്റ്റമാണ് തന്നെ കൊല്ലുന്നത്’ എന്ന് സുഹൃത്തുക്കള്‍ക്ക് അയച്ച സന്ദേശത്തില്‍ അലന്‍ പറയുന്നുണ്ട്.
ഇന്നലെ രാത്രിയോടെയാണ് കൊച്ചി ഇടച്ചിറയിലുള്ള ഫ്ലാറ്റിൽ വെച്ച് അലനെ അവശനിലയിൽ കണ്ടെത്തിയത്. അലൻ ഇപ്പോഴും അപകടനില തരണം ചെയ്തിട്ടില്ല. ആത്മഹത്യ ശ്രമമാണെന്നാണ് പോലീസ് പറയുന്നത്. തന്നെ ഇവിടുത്തെ സിസ്റ്റമാണ് കൊല്ലുന്നതെന്ന് ആരോപിച്ച് അലൻ സുഹൃത്തുക്കൾക്ക് വാട്സ് ആപ്പിലൂടെ സന്ദേശം അയച്ചതായി കണ്ടെത്തിയിട്ടുണ്ട്. ഇതില്‍ താന്‍ ഈ സിസ്റ്റത്തിന്‍റെ ഇരയാണെന്നും വിചാരണ നീണ്ടുപോകുന്നത് കൊണ്ട് തനിക്ക് പരീക്ഷ എഴുതാന്‍ കഴിയുന്നില്ലന്നും സൂചിപ്പിച്ചിരുന്നതായി പോലീസ് പറഞ്ഞു. അലന്റെ മൊഴി എടുക്കാൻ ശ്രമം തുടങ്ങിയതായി പൊലീസ് അറിയിച്ചു.